في أغلب الأحيان، تكون الكتابة حاجة، درب من دروب العلاج، مسكّن للآلام أو صديق يحملك بعيدًا عن الكبت المستمر والاحتفاظ بالألم داخلًا. وفي مواقع مختلفة، تكون الكتابة كأس إضافيّة من السعادة، فتكتب سعيدًا ناشرًا للسعادة، نبيّ أو رسول، أو تاجر للمخدّرات. أو في أدقّ وصف: صاحب حانة، لا تمنحهم إلّا ما يملكون في أحشائهم، إذ تقول الرواية إن الكحول يُخرج ما بداخلك فقط، لا يمنحك إلّا بعض الشجاعة لتقول وتفعل ما تفكّر به. ولكن، ما علاقة هذا كلّه بما سيُكتب هنا ؟ لا علاقة. ومن يبحث عن العلاقة بين الجمل، ليخرج سريعًا من هنا، فهذه المدوّنة ليست إلّا مساحة.

الاثنين، 28 يناير 2013

مع ايمن عوده "لكل ثائر عوغاه"

بشي يوم قبل انتخابات الكنيست باسبوع وانا بالباص بطريقي للبيت انتبهت انو في دعوه لامسيه جبهويه بقرية اعبلين فقررت اروح اسمع واحكي الي عندي عن مقاطعة الكنيست ومقاطعة الكيان الصهيوني عامة وبالمره بكون حلقة نقاش بالبلد .
مع وصولي كان ايمن عوده عم يحكي ويدعي الناس للتصويت وفج راسي لما سمعته بقول للناس "حط صوتك للجبهه مره وحده واحنا منخدمك 4 سنين كاملات " ، بدكو الصراحه لما اقنعو ابوي يحط ريسيفر حكو نفس الجمله .
بعد ماقنع الناس بالريسيفر اجا دوري احكي وحكيت كثير وحاول اكثر من مره يقطعني لحد ما قطعني بجملة " كنتو ادعوا لندوه بلقيها رازي " انا دعيت للندوه وانا بقرر وهو يعني بالفعل ممكن وقاحه مني ادعي للمقاطعه بندوه انتخابيه .
شو بدك بالطويله محسوبك شال بالحديث سياسي عاجتماعي وايمن والناس يسمعوا بعد ما خلصت حكي ارتجل ايمن عوده وقلي : انت بدك ترجع الناس للعشب ، الناس عم توكل اليوم "عوغوت" بما معناه بالعربي كعك .
مع ابتسامه صغيره من ايمن عوده اكتشفت انو نضاله للحفاظ على العوغوت صلب وانو الي بوكل عوغوت لازم يحافظ عالعوغوت والعوده للعشب الي اكلوه ثوار العالم عار.
ايه وعرض ستي الي ما بفرط فيه ما حدا بتحرر وهو يوكل عوغوت .
ومن اليوم وطالع لكل ثائر عوغاه .
واه بنساش بالاخر لما اتطلع علي وقلي "قدي عمرك؟! واحنا جيلك كمان كنا فينا هاي الروح وكنا بدنا كلاشنكوفات" شكلو صار الشيوعي يقيس الانسان حسب عمره ولا هو الرجعيه الي بتسكت الكبار عشان الصغار يعطو رايهن ؟
واه بخلال مسيرة العوغوت المنتظره بتكبروا وبتفهمو انو الثائر بيد عوغاه والاخرى زبده .
سنة الجاي شعار الانتخابات للكنيست الاسرائيلي رح تفوت الجبهه بدعايه انتخابيه بتقول " مساواه وكونديتوريا " .

الثلاثاء، 22 يناير 2013

لنقاطع

بهيك يوم منكوس ...
الهدف هو الي بحدد الطريق ، وبيوم ما يكون الهدف واضح بتصير الطريق واضحه ناصعه ووحيده . وبيتحول النظر لثاقب .
بيوم ما بيحتفل الاحتلال بديمقراطيته وبعرسه الديمقراطي مره كل سنين معدوده بيكون الاسير عم بيمرق عليه كمان يوم عادي بطل عالشمس من بين القضبان ويمكن بعيش ساعه افضل او اسوأ مع تبدل السجان باستراحة التصويت ... فالسجان ايضا له الحق في التصويت .
في يوم تبدل الجنود عالحواجز بنفس الاستراحه ... سيمر على العابرين من شعبي لشعبي وقت عصيب فها هم سينتظرون على الحاجز تحت اشعة الشمس وانهيار الاعصاب، مجند اخر سيمارس حقه في التصويت .
فالمصوتين سواسيه كلهم في الصناديق واحد .
كم اود ان ابكي فلا املك اي طريقه للتفريق بين صوت للجندي الفاشي وابن بلدي ، ابن شعبي من المصوتين.
الوان كثيره والصوت اسرائيلي ... قبطريقي الى العمل تقطع افكاري طريقي واجلس تحت شجره في حيفا وانتظر انتظر ان ارى فلسطين بالوان كاملة الفلسطينيه فاما مصوتين في صناديقنا الحره واما شهداء في رحم الارض ...
ارفعوا اصواتكم ولتختلف عن الاحتلال .
قاطعوا اسرائيل بكل ما اوتيتم من قوه وليصبح لي حق واحد في العوده وحق اخر في المقاومه .
لا تضعوا اصواتكم في صناديق ليست لنا ولا تشرعنوا احتلال فلسطين .
عاشت فلسطين حره

الجمعة، 11 يناير 2013

من باب الشمس

هي اول مره بحياتي بكتب بمدونه واول مره بحياتي بشارك ببناء قريه ...
من باب الشمس عم نشعر بدفئ الشمس بدون الشمس ، عم نحس بعظمة الشعب وضعف الاحتلال ويمكن اكثر اشي مثير هو انو الناس ممكن تتناقش سنين على امكانية بناء قريه وتاريخ بس الواقع القريه بنيت خلال 3 ساعات تقريبا كان جيش الاحتلال خلالهن مصدوم مش عارف شو يعمل ، كان بحالة عم يواجه ارادة شعب .
اجمل ما بباب الشمس انها لم تنتظر شروق الشمس بل اقتلعت الشمس ، شمس الامل والحريه .
يمكن اول مره بحس هالقد بمسؤوليه اتجاه ورقه مرميه عالارض ... لانها الارض ، باب الشمس .
ها نحن نكمل طريق كنفاني ونصبح نساء ورجال تحت الشمس .
ولربما سيهجروننا ونصبح  لاجئين ... وسنعود .
رازي نابلسي
باب الشمس-فلسطين.

الثلاثاء، 8 يناير 2013