من يومي الاول في النشاط السياسي لليوم، بعدني بسمع، ذات الخطاب من اصحاب العقلانية السياسية، التروّي، الكبر، الجيل والتهور. هاي المصطلحات الي ما بدها تخلص ولا تنتهي، بس صار لازم تنتهي.
ما زال حتى يومنا هذا، بعض العجّز ينادون بالتروي وينعتون بعضنا، واذا مش كلنا بما يُسمّى "اولاد مش عارفين شو بيعملو"، أو "بدهن يودوا البلد بداهية فش مسؤولية"، "مين انتم"، "انتو لمّا كنتو مش خلقانين لسّا احنا كنّا محرّرين الصومال"، .... الخ.
رح اوافق معكم، احنا لسّه اولاد اه، ما عشنا الحكم العسكري، ولا سمعنا عنّه.
رح اوافق معكم، احنا لسّه اولاد اه، ما عشنا انقاض الاتحاد السوفييتي، ولا اخذناه بعين الاعتبار.
٦٦ سنة وعقلانيتكم السياسية طاغية عالصورة، ناديتم بالتأمين الوطني، ناديتم بالمساواة، تحالفتم مع هذا وذاك بحجة الحقوق وعدم وجود الامكانيات، منذ اليوم الاول للاحتلال نمتم في احضان الهزيمة، نعم هُزمنا في عام ١٩٤٨ وفي عام ١٩٦٧ ولا ننكر هذه الحقيقة المُرة، لا ننكرها، بعرض ستّي معترفين، بس الفرق انّنا مش مستسلمين، ٦٦ سنة وانتم عم تشتغلوا بالعقلانية السياسية وهاتوا نشوف لوين وصلنا، تجنيد في ارتفاع، طبقية في ارتفاع، بعد عن الشارع في ارتفاع، تقسيم واستيطان في ارتفاع وفكريًا في انعدام، آه يمكن عم نحكي بهالصوت والطاقة لاننّا ما عشنا الهزيمة ولا شفناها، بس ليش مصمّمين تمرقولنا اياها؟!
عم بكتب ومش محرّر شو بكتب، لانه يمكن كمان طريقة الكتابة التقليدية بطّل الها حاجة.
اذا كانت عقلانيتكم وحكمتكم وتروّيكم قد اوصلونا لهون، اعطوا هالاولاد تشتغل. ما انتم هيك هيك فش عشو تخافوا غير عاستقراركم، وبصراحة الفيلسوف الي قال انو فش صح وكل اشي نسبي اذا لاقيته رح ارفش ببطنه.
اذا كان كل خطاب لا يُسلّم بالهزيمة ولدنة، نعم للولدنة السياسية.
ليست هناك تعليقات:
إرسال تعليق